تابع مأكولات مصرية

من طرف **الهام ظاظا** الأربعاء مارس 31, 2010 8:07 am

الفراخ البانية
صدور فراخ مخلية __ ملح و فلفل _2بيضة مضروبة بالشوكة مع 1/2 كوب حليب _ بقسماط ناعم _ دقيق .
تبلى الصدور باملح و الفلفل ثم ضعيها الاول فى الدقيق ثم تشيليها و تحطيها فى خليط البيض ثم فى البقسماط و تحطيهم جنب بعض فى طبق لحد ما تخلصى المقدار كلة و تسيبيه شوية بتاع 10 دقائق
المهم فى مقلاية تضعى مقدار متساوى من السمن و الذيت لحد مايسخن
ثم احمر الصدور عادى على الوشين بس تكون النار متوسطة .. لانها لو النار عالية حيتحرق الغلاف بسرعة و لو النار واطية ح تتشال الطبقة الخارجية و تسيب الصدور. فعلشان كدة خليها متوسطة و بعد ما يبقى لونها دهبى حلو تشيليها على الورق الماص المخصوص و بالهنا و الشفا

الفخده الضاني في الفرن
1 جيبه فخده تكون مليانه وتغسليها كويس جدا لان احياننا بتكون عليها جلد ابيض كده
وبعد متغسليها في الحته بتاعت نهايه الرجل خلي الراجل يكسرهالك
المهم ابشري على جنب حوالي 5 بصلات كبار خالص وحطيهم في مصفاه بتاعت الرز وحطي عليهم كالاتي ملح كتير +فلفل اخضر بهارات+معلقه خل + قرفه وطبعا ليمون حواي اربع ليمونات وافضلي اعصري في البصل لحد مينزل ميته كويس جدا وبعدين
2- على جنبي حضري 2 تفاح اخضر او تفاح عادي واعصريهم في عصاره الجزر او ابشريهم كويس واعصريهم يعني خلي العصير بس
3- 5 فصوص ثوم او 3 حسب حجم الفخده وتبتدي اولا جيبي سكينه عاميه واعملي شويه فتحات بالعرض تكون عميق جدا في الفخده وتكون كثيرة واسفل الفخده كمان وبعدين تبتدي تحطي مايه البصل الي محطوط عليها كل حاجه من بهارات وملح
وبعدين تقلبيها كتير فيها طبعا كل ده والثوم متقطعيهوش خالص لا زي ما هو بس متقشر
المهم طبعا كل متكون ميه البصل زياده احسن المهم حطب كمان عصير التفاح فوق الفاخده وحاولي تتاخدي انه بيدخل في الفتحات
ملحوظة : انا عن نفسي بحقن الفخده بسرنجه يعني حقنه جديده ونظيفه عشان يتغلل طعم البصل جواها
المهم بغزر فصوص الثوم داخل الفتحات كلها واتاكد من ملوحه اللسوس وبعدين طبعا بغطيها من بليل مثلا 8 بليل لحد 8 الصبح وهي متغطيه بالنايلن جوة الثلاجه عشان متقلبش رحيت الثلاجه
المهم الصبح احاول اقلبها تاني وابتدي اجيب الفلف الاخضر احط مثلا اتنسن وخلاص بحطها فوق شويه وهي نتغطيه بورق الفويل من فوق على البوتجاز من فوق مع التقليب وبعدين اولع الفرن واحطها في الوسط عشان تستوي براحتها وبصراحه بتاخد وقت كتير صحيح لكن لما بتستوي على الهادي بتطلع رهيبه
المهم طبعا مع التقليب خلاص حسيتي انها استوت هندخل مرحله وضع بعض الخضراوات لو عايزة زي البسله او جزر لكن انا بصراحه مبحطش غير بطاطس وكرفس بسيط ولما احس البطاطس محتاجه شويه شربه بحط عليها مش على الفاخده ميه بصل
المهم خلاص كله استوى بشيل الفويل واسبها تاخد لو ن الاحمرار الطبيعي خالص من الشوايه لكن بعد ما تقريبا تبقه مستويه جدا
وبطلعها بقه بتكون شكلها ناشف من برة لكن من جوة رهيبه زي الاوزي
وبعدين بحطها في طبق التقديم ودايما بعملها مع الرز بالخلطه وبعدين اقولكم بعمله ازاي
واتمنى تعجيكم بتبقى رهيبه في العزومات
نسيت اقولكم(شيلوا فصوص الثوم قبل التقديم عشان في ناس مبيحبوهاش)

المهلبية
مثلا 2 كوب لبن بارد _ ملعقة كبيرة مليانة نشا (كورن فلور) _ السكر حسب التذوق يعنى مثلا 3 معالق _ ربع معلفة فانيليا
خدى من اللبن نص كوب و قلبى فية النشا لحد ما تذوب
ضعى باقى اللبن على النار و حلية بالسكر لحد مايغلى
ضعى اللبن الباقى بالنشا و خلى ايدك سريعة فى التقليب عشان ما تكلكعش
لحد ما حتلاقيها مسكت شوية و بقيت ناعمة
صبيها فى الكاسات وممكن تزوقيها بالذبيب و رشة قرفة ناعمة
او بالمكسرات المفرومة . (ملحوظة )
ممكن تذودى المقدار زى ما انتى عاوزة يعنى تضعفى المقدار المكتوب
طريقة للتقديم
بعد ماتخلصى المهلبية و تبرد فى الثلاجة .. هاتى باكو جيلى احمر او اخضر ذوبية على النار بكوبيتين ماء لحد ما يغلى و يبرد كويس
تطلعى كاسات المهلبية من الثلاجة و تصبى فى كل كاس جيلى فوق المهلبية
وتدخلية الثلاجة لحد ما الجيلى يجمد
عند التقديم بيبقى شكلها حلو قوى
( بس على فكرة لو حتعملى المهلبية بالجيلى يبقى خلى المهلبية فى نص الكاس بس و اعملى حساب الجيلى فى النص التانى )
طريقة اخرى
المهلبية فى الفرن
بعد ماتخلصى المهلبية و قبل وضعها فى الثلاجة صبي المقدار فى اطباق بايركس صغيرة او فويل او طبق بايركس كبير
ضعى على وش المهلبية ذبدة سايحة حوالى ملعقة كبيرة و رشى عليها رشة سكر بودرة و دخليها الفرن حتلاقيها بتغلى سيبيها خالص لحد ما وشها يحمر خالص و طلعيها . و بالهنا و الشفا دى اكتر انواع فى المهلبية مطلوبة فى البيت

ميلك شيك
تجيبو كوبايتين ايس كريم فانيليا من السوبر ماركت عادى او العلبة الكبيرة مثلا دولسى ولا كرنفال ولا اى حاجه من الكلام ده وتاخدو منها كوبايتين وعليهم نص كوباية كريمة مضروبة و3 معالق سكر وكم حبة فراولة لو عايزاه بالفراولة او معلقتين كاكاو او نسكويك او رشة فانيليا على حسب انتى عايزاه ايه وتخلطى كل ده بالخلاط وتصبيه بالكوبايات وعلى الفريز على طول
ساعة كده وطلعيه واشربى

صينية الجلاش باللحمة المفرومة

نصف كيلو جلاش (باكو)
لحمة مفرومة معصجة
بيضتان
ملح ,فلفل
كوب حليب ( طويل او مج)
سمن
الطريقة
اضرب البيضتين بالشوكة و عليهم ملح وفلفل و احطهم على كوب اللبن واخلطهم كويس قوى بالشوكة.
تدهن صينية بالسمن ثم نضع نص كمية الجلاش مع المسح بالفرشاة سمن بين كل ورقتين و هكذا حتى ننتهى من نص الكمية ثم اضع اللحمه المعصجة مع فردها كويس ثم نضع نص كمية الجلاش التانية بنفس الطريقه الاولى ثم ادهن وجة الصينية بالفرشاة بالسمن و اقطع الجلاش بالسكينة اما مثلثات او مربعات وادخلها الفرن حوالى 10 دقائق حتلاقيها وشها احمر خفيف اروح مطلعاها و صبة عليها كلها كوب اللبن بالبيض و ادخلها تانى الفرن لحد ما تستوى و تحمر . تطلعيها و تعيدى تقطيعها على القطعة السابقة و بالهنا و الشفا

الكريم كراميل
اولا : الكريم :
4 اكواب حليب _8 بيضات _3ملاعق كبيرة سكر_2 كيس فانيليا
الكراميل :
كوب كبير سكر _ معلقة شاى صغيرة ماء _ قوالب صغيرة او قوالب فويل صغيرة او صينية او فورمة الكيكة او قوالب الكيك المستطيلة
نبل القوالب اللى حنحط فيها الكريم كراميل من الداخل و نكب الماء الذائد
لعمل الكراميل نضع السكر فى مقلاية وعلية الماء ونقلب لحد مانلاقى السكر بدء بصفر ثم بدء يبقى بنى فاتح ثم بنى غامق
نشيلة و نصبة على طول فى القوالب المبلولة بارتفاع 1 او 2 سم .
لعمل الكريم
ندفى اللبن مع السكر على النار و نطفى النار ثم نضع علية البيض المضروب والمضاف له الفانيليا
و نضربه كويس بالمضرب السلك اليدوى او الكهرباء .
نصبة فى القوالب على الكراميل
ونرصص القوالب فى صينيه كبيرة بها ماء لربع ارتفاع القوالب فقط علشان لما الماء يغلى ما يخشش فى القوالب يبوظها
ونضع الصينية على النار حوالى ساعة او لحد ماتلاقى الكريم كراميل مسك نفسه
اشيله من على البوتجاز و ادخلة الفرن لحد ما يكمل سوى ووشه يحمر
نطلعة و نحطه يبرد فى الثلاجة و عند التقديم نمسك القالب بايدنا وفوقه طبق مقلوب ونهز القالب لحد ما يتقلب فلى الطبق حيبقى الكريم تحت و الكراميل فوق .

فراخ بانية
منقولة من اخت فاضلة مجربة و جميلة جدا و طرية
نص كيلو صدور _2 كوب حليب _ملعقة بهارات _ملح _فلفل _2 ملعقة خل _ملعقة زيت زيتون _فصين ثوم
الطريقة :
يقلب المقدار جيدا ثم توضع فيها الفراخ وتترك ( كلما زادت مدة النقع تعطيها طراوة و طعم مميز .
نجهز الغطاء الخارجى:كوب دقيق + كوب بقسماط ناعم + رشة ملح +رشة فلفل +ملعقة بهارات .
ناخد شريحة من الفراخ و نضعها فى خليط الدقيق على طول ( بدون بيض ) و نحمرها فى زيت غزير الى ان تصبح زهبية اللون ,و بالهنا و الشفا.

كيكة شوكولاته
(ام زياد)رهيييبه بجد كل اللى دافها عجبته جدآ وكمان سهله أوى للمبتدئات وسريعه
المهم..
المقادير:-3بيضات
1و ربع كوب سكر
كوب الا ربع زبده أو ممكن اصبع زبده الصغير خالص( 113جرام)
نصف كوب كاكاو ويفضل غامق
1ونصف كوب دقيق
2علبة زبادى كبير-أو ممكن نقول كوب زبادى
2 كيس فانيليا
1 كيس بكنج باودر
الطريقه:-
بالمضرب الكهربا اضربى البيض مع السكر والزبده كويس
ثم أضيفى (الدقيق المخلوط مع البكنج باودر والكاكاو)تدريجيآ مع الضرب المستمر
وفى الآخر ضعى الزبادى واضربى بردوا لغاية ما يتخلط الخليط كويس
ادهنى صينيه بالسمن او الزبد وبطنيها بالدقيق
ثم ضعى الخليط وساويه بالملعقه لأنه تقيل
ضعيها فى فرت 180 درجه فى الوسط لمدة نص ساعه تقريبآ,ثم تأكدى انها استوت بوضع خله فيها اذا خرجت نظيفه تبقى استوت,اخرجيها من الفرن وسيبيها تهدا خالص وتبرد ثم اقلبيها من الصينيه
الصوص:-نصف اصبع زبده+نصف قالب شوكولاته خام كبير(يعنى حوالى 300 جرام شوكولاته)+لبن أو حليب حوالى 7-8 ملاعق كبار ويوضعوا فى حمام ماء على النار لغاية ما يسيح وتقلبى الى ان يمتزجوا مع بعض وممكن ضيفى لبن شويه شويه لو عايزا الصوص يخف
وبعد كده يصب الصوص عليها ويرش عليها البندق المجروش وممكن تؤكل دافئه

بجد لازم تجربوها لأنها تحفه ومضمون نجاخها ان شاء الله
ملحوظه :لا تفتحى أبدا على الكيك قبل مرور نص ساعه على الاقل كى لا تهبط
وكمان لما تفتحى الفرن افتحيه براح وبشويش

بالنسبة للكنافة
هاتى كنافة برما حتكون عبارة عن خصلات طويلة _ مكسرات مفرومة او فستق صحيح _ شربات _سمن سائح.
شيلى بالراحة خصلة رفيعة و حطيها امامك مفرودة . بالفرشاة ادهنى الخصلة بالسمن السائح بطول الخصلة . ثم ضعى صباعك الكبير التخين على اول الخصلة و ابدئى ليفى الخصلة على صباعك بمساعدة الصبعين اللى جنبه لحد ما حتتكون عندك دائرة بشكل عش العصفور و هكذا حتى تعملى العدد اللى انتى عوزاة مع مراعاة ان الخصلة اذا كانت طويلة قوى تقطعيها بالسكينة
ثم ارصص وحدات العش فى صينية مدهونة بالسمن و بايدى اضع داخل كل عش كام واحدة فستق او شوية مكسرات
امسح بالفرشاة بالسمن على كل وحدات العش و ادخلها الفرن لحد ماتحمر اخرجها و اسقيهم بالشراب البارد و بالهنا
طريقة الكريم شانتى
اذا كنتى حتعمليها بودرة يبقى اتبعى التعليمات اللى على العلبة
او هاتى نص كيلو كريمة لبانى من بتاع اللبن او علبه قشدة الخفق من السوبر ماركت صبيها فى طبق غويط و بالمضرب الكهرباء ابدئى بالضرب و ضعى سكر بودرة حسب الطعم واضربى على سرعة متوسطة لحد ما تلاقى الكريمة ذادت و بفيت خفبفة و هشة زى الايس كريم او زى القطن لازم توقفى المضرب على طول لحسن حتلاقيها فصلت منك وهكذا تكون صالحة للاستخدام بس حطيها فى الثلاجة

الارز باللبن1) الارز حنسلقة الاول علشان ماياخدش معاكى وقت على النار
2)خلى بالك لاتتركية على النار بعد السوى لان الارز طول ماهو على النار بيفضل يتخن و كدة يااما حتغرفية حيكون تخين او انك حتضطرى تذودى لبن فكدة خلاص حتلوصى معاة
3) بناء على الخبرة اذا كنتى حتعملية للضيوف خلاص اغرفية فى الكاسات او الاطباق
............*لكن اذا كنتى حتعملية للبيت و الاولاد يبقى تحطية فى الاطباق البلاستيك اللى بالغطاء ( زى اللى بنشترى فيها الذبادى البلدى ) اشتريها بالجملة هى رخيصة جدا و خليهم عندك فى البيت للمهلبية و الارز بالبن و الجيلى
(( لان الارز باللبن بعد مايبرد تفطى العلبه بالغطاء بتاعها حتفضل عندك فى الثلاجة طرية و جميلة زى اللى بنشتريها ))
انا بحط قبل مااطفى النار على طول ملعقة كبيرة او اثنين جوز هند بدل الفانيليا ما تخافيش طعم الجوز الهند ما بيبنش لكن بيدى بياض و ريحة جميلة
للسهوله كل كوب لبن بنحط له 21/1 ملعقة كبيرة ارز اظن كدة سهل علشان ماتتقيديش بالكيلو و لا بالتر
المقادير : مثلا 6كوب لبن _ 9 ملاعق ارز _ السكر حسب التزوق _ملعقة كبيرة جوز هند _او نص ملعقة صغيرة فانيليا _ زبيب او مكسرات مفرية او قرفة الزواق دة لزوقك و لرغبتكم .
اغسل الارز و احطة على النار وعلية ماء مغطياة ب 2سم وعلى نار هاديه حتلاقية استوى او يقرب للسوى و يكون شرب الماء
اضع علية السكر حتلاقية داب اسرع
ثم اضع اللبن مع التحريك المستمر علشان مايفورش و ظبتى تانى السكر
هاتى ربع كوب ماء و زوبى فية 2 ملعقة كبيرة نشا كويس و انزلى واحدة واحدة على الارز باللبن و بأيدك التانية بتقلب لحد ما تلاقى الارز بدء يتخن ضعى الجوز الهند وقلبى و اطفى النار و اغرفية و كل مايبرد حيمسك نفسه شوية كمان
بعد ما يبرد ضعى الغطاء البلا ستيك و عللى الثلاجة و بالهنا و الشفا
ملحوظه: مقدار اللبن زى ماانتى عاوزة يعنى حتعملى كوب حتعملى اتنين حتعملى كيلو حتحطى مقدار الارز زى ما فهمنك.

الشاورما
1 علبة ذبادى_بصلة متوسطة _ طماطماية متوسطة _2 ملعقة خل _1/2 ملعقة سماق _ 1/2 ملعقة كارى _ عصير 1/2 ليمونة _ 2 فص ثوم _ 1/2 ملعقة تابل شاورما . دجاجة كاملة مخلية او صدور دجاج مقطعة شرائح رفيعة
[الطريقة
1) نضرب كلة فى الخلاط بتاع العصير ( الدورق ).
2) نفتح الفرخة من ظهرها بالطول و نضع عليها المقدار المضروب .
3) ونتركها ساعة ثم نضعها على النار و نغطى الصينية بورقة فويل لحد ماتستوى نص سوى .
3) نتركها تبرد ثم نقطع الفراخ شرائح رفيعة مثل الشاورما و ممكن تقطعيها بأيدك على طول من غير سكينة حتلاقيها سهلة جدا ((مع الاحتفاظ بالسائل الموجود فى الصينية ))
4)نضع شوية زيت فى صينية يعنى حوالى 3 معالق كبيرة . ونفرد فيها الشاورما الى ان تحمر من جهة ثم نقلبها تحمر من الجهة التانية .
5) ارش عليها شوية من السائل اللى سبق و احتفظنا به و اقلبهم علشان تاخد شوية طراوة . وكدة اصبحت جاهزة
طبعا انتى عارفة طريقة تقديمها بتجيبى العيش الشامى و تفصلى الوش عن الضهر او تعملى الرغيف زى ماهو و تدهنية بالمايونيز المخصوص اللى حقولك طريقتة حالا .ثم شرائح خيار مخلل او كام صابع بطاطس محمرة و بالمعلفة نحط الشاورما ونلف الرغيف و تلفية فى ورقة ذبدة و بالهنا و الشفا
طريقة مايونيز الشاورما: 2 فص ثوم _ بعض نقاط عصير ليمون _و بعض نقط خل _نضعهم على المايونيز ونقلبهم بالمعلقة ثم ندهن بيهم الرغيف .

بعض الملاحظات
السماق اظن بقى معروف قوى دلوقتى فى مصر هو زى البودرة الخشنة و لو نه محمر
تابل الشاورما
انا بجيبة من السعودية بنفس الاسم و العلبة بتقعد عندى طول السنةو هى ب 10 ريال و البديل بتاعة اعتقد من عند العطار اسمها بهارات شاورما
........ على فكرة انا عندى ماكينة صنع الشاورما زى اللى فى المحلات فاأللى عندة الماكينة يوقف الخطوات وبعد ما يتبلها ساعة ينغزها فى عمود الماكينة و العمود حيلف لوحدة لحد ماتستوى زى المحل بالضبط و بالهنا و الشفا.

البيكاتا بالمشروم
شرائح بفتيك بتلو (العدد حسب ماانتى عاوزة) - ملح - فلفل – عصير ليمونة – ملعقة كبيرة زبدة_ علبة مشروم صغيرة مقطعة قطع صغيرة - 2 علبة كريمة لباني الحجم الصغير- 3 بصلات كبار مقطعين صعير
الطريقة:
يتبل شرائح البفتيك بالملح والفلفل و عصيرالليمون ثم نضع الذبدة في صينية يا ريت لو تيفال على النار و لما تسيح نضع اللحمة و نحمرها على نار هاديةمع التقليب باستمرار من الناحيتين لحد ما الوشين يتحمروا . ثم اشيلهم من الصينية فى طبق و بعدين احط البصل فى الصينية مكان اللحمة اللى شيلتها و اقلبه لحد ما يدبل ( يعنى تحسى انه بقى طرى ) و بعدين تروحى حطة المشروم المقطع مع البصل و تقلبيهم لحد برضة اما تحسى ان المشروم دبل . و بعدين تروحى حطة الكريمة اللبانى على البصل والمشروم فيغلي لحد ماتلاحظى ان الكريمة اللبانى تخنت شوية .( خلى بالك كل دة حياخد منك مجرد ثوانى علشان الكريمة اللبانى ما بتستناش كتير على النار ) وبعدين تروحى حطة اللحمة اللى كنتى شيلتيها على جنب فى طبق فى الصينية و يادوب تلفى اللحمة لفة فى الكريمة اللى فى الصينية و تلاحظى انها عليها كريمة من الوشين تشيليها فورا. وبالهنا و الشفا

الفاهيتا
4 فلفلات رومى كبيرة _ 4 طماطماية كبيرة _ 2 معلقة كبيرة ذبادى _ 5 فصوص ثوم _ 1معلقة صغيرة كارى _ 1 بصلة كبيرة _ 2 معلقة خل _ ملح وفلفل
صدور فراخ مقطعة مكعبات حلوة مش صغيرة
الطريقة
تعمل بنفس طريقة الشاورما ماعدا( الفلفل و الطماطم )
فى مقلاية تيفال كبيرة نضع قليل من الذيت ثم نرصص الفراخ الا ول داير مايدور المقلاية فى الطرف خالص
ثم وراها على طول ترصصى الفلفل المقطع داير مايدور ثم نرصص الطماطم ورا الفلفل داير ما يدور
فخلى بالك حيفضل فية مكان فاضى فى منتصف المقلاية
نترك كلة لحد ما كلة يسخن و ينزل مايتة وطبعا كل واحد حيستوى و يشرب من ماء التانى اللى جانبه فحيبقى الطعم رائع المهم لما يشربوا الماء اللى حينزل خالص
........................ فى المنتصف فى الحتة اللى فاضية نطش الخل حيطلع دخان ثم نقلبهم بسرعة مرتين مع بعض و نطفى و نعمل السندوتشات
و بالهنا و الشفا
ملحوظة : مهمة قوى طريقة ترتيب المقلاية يعنى مش بنحط كلة على بعضة لآلآلآ ودة سر برضة

التشيز كيك2 باكو بسكوت شاى الاربعه و عشرين قطعة _ باكو زبدة 113 جرام _2كيس كريمة _باكو جيلى دايب فى 2 كوب ماء و بارد_ يا اما 2 علبة جبنة فيلاديفيا سعر العلبة 13 جنية او 2 علبة جبنة كيرى العلبة الواحدة 8 قطع _ مربى(( لو استخدمتى الجيلى لون احمر مثل الفراولة مثلا يبقى تستعملى المربى نفس النوع ..و لو استعملتى الجيلى اصفر مشمش يبقى تستعملى المربى مشمش ))
الطريقة
1) اضربى الذبدة كويس قوى لوحدها بالمضرب حد ماتبقى هشة قوى
2)ضعى عليها البسكوت المطحون لحد ما يندمجوا مع بعض
3)هاتىالصينية اللى بيتشال قعرها وادهنى الاول بنقطة واحدة زيت
و اكبسى فيها قوى البسكوت بالذبدة و دخليها الفريزر لمدة ساعة
4)فى سلطانية مقعرة اضرب الجبنة مع التخفيف بقليل قليل من الماء لحد ماتبقى خفيفة يا لاروز و ناعمة
5)اضع الكريمة على الجيلى و اضربهم مع بعض ثم اضع عليهم الجبنة المضروبة و اخلط كله ثم اصبها على البسكويت و ادخلها الفريزر
و يا سلام لو الزواق بتاعها يبقى من نفس نوع المربى و الجيلى

و بالهنا و الشفا .

اتمني يعجبكم الموضوع

منقول